ಪುಟಾಣಿ ಕಥೆ 41-50

ಪುಟಾಣಿ ಕಥೆ - ೪೧

ಸಣ್ಣಗಾಗಲು "ವಾಕಿಂಗ್, ವ್ಯಾಯಾಮ" ಎಂದೆಲ್ಲಾ  ಮಾಡುವರು. ಆದರೆ ಸಣ್ಣಗಾದವರನ್ನು "ಯಾಕ್ಹೀಗೆ?" ಎಂದು ಕೇಳುವರು. ಜನರೇಕೆ ಹೀಗೆ ಎಂದು ಅವಳಿಗೆ ಯಾವಾಗಲೂ ಪ್ರಶ್ನೆ!!

ಪುಟಾಣಿ ಕಥೆ - ೪೨

ಹೆಣ್ಣು ಮಗುವಾಯಿತೆಂದು ಚಿಂತಿಸುತ್ತಿದ್ದ ಆತ. “ಅಜ್ಜಿ ಮತ್ತು ಅಮ್ಮ ಇಬ್ಬರೂ  ಹೆಣ್ಣಲ್ಲವೇನಪ್ಪ? ನಿನಗೆ ಅಮ್ಮ ಬೇಕು, ಮಡದಿ ಬೇಕು, ಆದರೆ ಹೆಣ್ಣು ಮಗಳು ಮಾತ್ರ ಬೇಡವೇನಪ್ಪ??" ಕೇಳಿದ ಮಗ. 

ಪುಟಾಣಿ ಕಥೆ - ೪೩

ಮಾತು ಮೌನದ ಜೊತೆ ಹೇಳಿತು "ನಾ ನಿನ್ನಂತೆ ಇರಬೇಕು" ಎಂದು. "ಮಾತಿನಿಂದ ಮೌನಕ್ಕೆ ಅರ್ಥ, ಮೌನದಿಂದ ಮಾತಿಗೆ ಬೆಲೆ. ಎರಡು ಒಂದರ ಜೊತೆ ಒಂದಿದ್ದರೆ ಅರ್ಥ ಇಲ್ಲದಿರೆ ಅನರ್ಥ" ಎಂದಿತು ಮೌನ.

ಪುಟಾಣಿ ಕಥೆ - ೪೪

ಆಸ್ಪತ್ರೆಯಲ್ಲಿ ಮಲಗಿದ್ದ ಮಡದಿಗೆ "ಒಂದು ಗಂಡುಮಗುವನ್ನು ಹಡೆಯಲಾಗಲಿಲ್ಲ ನಿನಗೆ, ಎಲ್ಲದಕ್ಕು ನೀನೆ ಕಾರಣ" ಎಂದು ನಿಂದಿಸುತ್ತಿದ್ದ ಆತ. " ಅದಕ್ಕೆ ಕಾರಣ ನೀನು, ಅವಳಲ್ಲ" ಎಂದರು ಅಲ್ಲಿಯೇ ಇದ್ದ ವೈದ್ಯರು!!

ಪುಟಾಣಿ ಕಥೆ - ೪೫

"ಇನ್ನು ಮಗುವಾಗಿಲ್ಲ" ಎಂದು ಯಾವಾಗಲು ಚುಚ್ಚು ಮಾತಮಾಡುತ್ತಿದ್ದಳು ಅತ್ತೆ. "ಮಗನನ್ನು ಹಡೆದ ನೀವು ನೆಮ್ಮದಿಯಿಂದ ಇರುವಿರಾ ಅತ್ತೆ??" ಎಂದು ತನ್ನ ಕುಡುಕ ಗಂಡನನ್ನು ನೆನೆಯುತ್ತಾ ಕೇಳಿದಳು. 

ಪುಟಾಣಿ ಕಥೆ - ೪೬

ಮಾತು ಮೌನದ ನಡುವೆ ಸ್ನೇಹ ಬೆಳೆಯಿತು. "ನಾನೇ ಚೆಂದ ಎಂದುಕೊಂಡಿದ್ದೆ, ನೀನು ಇಷ್ಟೊಂದು ಚೆಂದ ಎಂದು ಈಗಲೇ ತಿಳಿದಿದ್ದು" ಪರಸ್ಪರ ಹೇಳಿಕೊಂಡವು.

ಪುಟಾಣಿ ಕಥೆ - ೪೭

ಪದಕದೊಂದಿಗೆ ಬಂದ ಮಗಳು " ನಾನೆ ಶಾಲೆಗೆ ಮೊದಲಿಗಳಮ್ಮ" ಎಂದು ಖುಷಿಯಿಂದ ಹೇಳಿದಳು. “ನನ್ನ ಪುತ್ರವ್ಯಾಮೋಹವನ್ನು ಬಿಡಿಸಿ ಕಣ್ಣು ತೆರೆಸಿದೆ ಕಂದ " ಎಂದು ನುಡಿದಳು ಮಗಳನ್ನು ಅಪ್ಪಿ ಅಮ್ಮ!!"

ಪುಟಾಣಿ ಕಥೆ - ೪೮

"ಡ್ರೆಸ್ ಸರಿಯಾಗಿ ಹಾಕಿದ್ದರೆ  ಅವರು ಛೇಡಿಸುತ್ತಿರಲಿಲ್ಲ" ಎಂದು ನೊಂದ ತಾಯಿ ಹೇಳಿದಳು ಮಗಳಿಗೆ.

"ನೀನು ಸೀರೆ ಹಾಕಿದ್ದಾಗಲೆ ಅಲ್ವಮ್ಮ ನಡೆದದ್ದು?" ಅಳುತ್ತಾ ಕೇಳಿದಳು ಮಗಳು!!

ಪುಟಾಣಿ ಕಥೆ - ೪೯

"ಮದ್ಯಪಾನ, ದುಷ್ಪರಿಣಾಮ  ಮತ್ತು  ಅದರ ನಿಷೇಧದ  ಬಗ್ಗೆ ನಿರರ್ಗಳವಾಗಿ  ಮಾತನಾಡುತ್ತಿದ್ದನು ವೇದಿಕೆಯಲ್ಲಿ ಆತ. ಸಂಜೆ ಮನೆಗೆ ಬದಲಾಗಿ "ಹೊಸವರ್ಷದ ಪಾರ್ಟಿ "ಎಂದು ಬಾರ್ ಕಡೆಗೆ ನಡೆದನು!!!

ಪುಟಾಣಿ ಕಥೆ - ೫೦

'ಆಹಾರದಲ್ಲಿ ರಾಸಾಯನಿಕ ಪದಾರ್ಥಗಳ ಕಲಬೆರಕೆ ಆರೋಗ್ಯಕ್ಕೆ ಹಾನಿ' ಎನ್ನುತ್ತಿದ್ದಳು ಆಕೆ.

"ನೀವು ಉಪಯೋಗಿಸುತ್ತಿರುವ ಸೌಂದರ್ಯವರ್ಧಕ ಸಾಧನಗಳಲ್ಲಿರುವ ರಾಸಾಯನಿಕ ಪದಾರ್ಥಗಳು ಆರೋಗ್ಯಕ್ಕೆ ಹಾನಿ ಮಾಡುವುದಿಲ್ಲವೆ?" ಕೇಳಿದಳು ಗೆಳತಿ!!